Мемлекет басшысы Қасым-Жомарт Тоқаев Astana Think Tank форумының пленарлық отырысында сөз сөйлеп, жаһандық және өңірлік мәселелерді талқылауға арналған осы алаңның маңыздылығын атап өтті, деп хабарлайды alataunews.kz.
Президент қазіргі әлемнің аймақтық қақтығыстар, экономикалық тұрақсыздық, климаттың өзгеруі, азық-түлік және көші-қон қауіпсіздігі секілді сын-қатерлермен бетпе-бет келіп отырғанын айтты. Бұл жаһандық мәселелерді шешу үшін күш-жігерді біріктіру қажеттігін ерекше атап өтті.
“Біздің болашағымыз осы мәселелерге ортақ келісім таба білуімізге байланысты. Қазақстан бұл үдерістерге белсенді қатысып, үлесін қосуға дайын,” – деді Тоқаев.
Президенттің пікірінше, әлемнің жікке бөлінуі мен көпжақты халықаралық институттардың беделінің төмендеуі орта державалардың рөлін күшейтіп отыр. Ірі державалар арасындағы тартыстарды реттеуде орта державалар маңызды дәнекер бола алады.
Сонымен қатар, Қасым-Жомарт Тоқаев Қазақстанда жүргізіліп жатқан саяси реформалар мен жақында өткен АЭС құрылысы бойынша жалпыхалықтық референдумның елдің демократиялық құндылықтарға беріктігін көрсеткенін айтты.
