Шараны Қазақстан Республикасының Мемлекеттік қызмет істері агенттігінің Алматы облысы бойынша департаменті ұйымдастырды. Жиынға департамент басшысы Арсен Жақыпов төрағалық етті.
Дөңгелек үстелдің мақсаты басшылық лауазымдардағы әйелдердің үлесін арттыру, мүмкіндігі шектеулі азаматтар үшін тең жағдай жасау және жастарды қолдау мен мемлекеттік қызметте тең жағдайлар мен мүмкіндіктерді қалыптастыруға бағыталған мәселелерді талқылау.
Шараға ҚР Парламенті Сенатының депутаты Ғалиасқар Сарыбаев, Алматы облысының облыстың мемлекеттік органдардың басшылары, әдеп жөніндегі уәкілдер және өңірдің жас мемлекеттік қызметшілері қатысты.
Пікір алаңында Сенат депутаты Ғалиасқар Сарыбаев мемлекеттік қызметтің қоғамдағы рөлін баса айтып, қатысып отырған жас мемлекеттік қызметшілерге мемлекеттік қызметтің басты бағыттарын нұсқады.
Департамент басшысы Арсен Абзалұлының айтуынша, демократиялық мемлекет құрудың маңызды факторы гендерлік теңдік болып табылады. Алматы облысындағы мемлекеттік қызметтегі әйелдердің үлесі тұрақты және 50%-ды құрайды.
Бұдан басқа, Мемлекет басшысының тапсырмасын орындау шеңберінде жоғары үлгерімін көрсеткен және грант бойынша білім алған (аудандық және ауылдық деңгейдегі төменгі лауазымдарға тікелей тағайындау) жоғары оқу орындарының түлектері және оқуды сәтті аяқтаған (өңірлік деңгейдегі лауазымдарға) Мемлекеттік басқару академиясының түлектері үшін мемлекеттік қызметке «кіру» тәртібі жеңілдетілгені туралы айтылды.
