Мәдениет шағын ауданында 2014-2015 жылдардан бері жекеменшік тұрғын үйлер тұрғызыла бастаған. Көктем айы басталғалы аталған ауданның тұрғындарының ішкен астары бойларына батпай жүр. Өйткені тұрғын үйлер сүріліп, аталған аумаққа темір жол түседі дегенді естіген.
«Маңдай терімізбен ақша тауып, кезінде бір участокты 10 миллионға сатып алдық. Баспана тұрғыздық. Енді үйлерімізді сүреміз деп жатыр әкімдік. Жеріміздің де, үйіміздің де құжаттары түгел, заңды. Нотариус арқылы жеке үй құрылысы (ИЖС) ретінде жасалған. Ауыл тұрғындарының 90% құжаты бар», — дейді тұрғын Дастан Айтбаев.
Тұрғындардың айтуынша, Алатау ауданының да, Алматы қаласы әкімі Досевпен де кездескен. Алайда, көңіл көншітер жаңалық жоқ. Ал тұрғындар ереуіліне келген билік өкілдері мәселе тек желтоқсан айында ғана шешіледі дейді. Мәселені облыстық Alataunews.kz сайты назарда ұстайтын болады.
