Дүйсембиновтың мәліметінше, Алматы облысында күрделі жөндеу жұмыстары 2-3 жылға кешігіп қалды, тиісті деңгейде жүргізілмеді және техника бос тұр.
Сенатор мердігер компаниялардың өз міндеттемесін уақтылы орындамауы және сапасыз атқаруы, білікті мамандар мен қажетті техниканың жетіспеуінен деп санайды.
Оның айтуынша, бұған себеп конкурстардың өткізілуін қадағалау мен бақылаудың болмауы, сондай-ақ конкурста жеңіп шыққан мердігерлердің міндеттемесі қосалқы мердігерге берілуі болып отыр. Бұл жауапты адамдарды да іздеуді қиындатады.
«Өңірде жол жөндеу жұмыстарының уақытында жүргізілмеуі, жолдардың пайдалануға берілген бөлігінде жол жиектерінің жасалмауы және пайдаланудағы жолдардың төмен сапасы жол-көлік оқиғасы көрсеткіштерінің жыл сайын өсуіне себеп болып отыр», – деді сенатор Сұлтан Дүйсембинов.
Осы орайда, ол облыстағы автомобиль жолдарын күрделі жөндеу бойынша тиісті құзыретті органдарға тексеру жүргізуді ұсынды.
Сондай-ақ жол жөндеу жұмыстарының сапасын тұрақты бақылаудың нақты алгоритмін әзірлеуді, жол саласының тиісті мамандарын даярлауды және конкурс өткізу тәртібін реттейтін нормативтік-құқықтық актілерді қайта қарау керек екенін айтты.
