«Рухани келісім – әділетті елдің мызғымас құндылығы» тақырыбында өткен кездесуді Алматы облысының Дін істері басқармасы қолдауымен ұйымдастырды. Басқосуға Діни бірлестіктер көшбасшылары клубының мүшелері, өңірдегі түрлі конфессиялардың өкілдері, дінтанушы ғалымдар мен тәуелсіз сарапшылар қатысты.
Кездесудің негізгі мақсаты – қоғамдағы рухани келісімді нығайту, діни сенім бостандығына құрметпен қарау мәдениетін қалыптастыру және әртүрлі діни бірлестіктер арасындағы ынтымақтастықты дамыту.
Жиынның ашылуында сөз сөйлеген Алматы облысы Дін істері басқармасының басшысы Ерғали Көшеке қоғамдағы бейбітшілік пен тұрақтылықты сақтауда дінаралық келісімнің маңызы зор екенін атап өтті.
Оның айтуынша, түрлі діни көзқарастар мен сенімдерге құрметпен қарау, адамдар арасындағы өзара түсіністік пен сенімді арттыру – қоғамдық бірлікті нығайтудың негізгі шарттарының бірі. Басқарма басшысы конфессияаралық татулықты сақтау тек мемлекеттік органдардың ғана емес, бүкіл қоғамның ортақ жауапкершілігі екенін жеткізді.
Дөңгелек үстел барысында қатысушылар діни бірлестіктер арасындағы байланысты нығайту, этносаралық татулықты сақтау және қоғамдағы рухани құндылықтарды дәріптеу бағытында пікір алмасты. Әсіресе жастар арасында діни сауаттылықты арттыру, діни экстремизмнің алдын алу және түсіндіру жұмыстарының тиімділігін күшейту мәселелеріне назар аударылды.
Сарапшылар қоғамда өзара құрмет мәдениетін қалыптастыру үшін түрлі конфессия өкілдерінің ашық диалог жүргізуі маңызды екенін атап өтті. Олардың пікірінше, мұндай кездесулер әртүрлі діни қауымдастықтардың бір-бірін тереңірек түсінуіне, ортақ мәселелерді бірлесе шешуіне және қоғамдық келісімді нығайтуына мүмкіндік береді.
Басқосу барысында қатысушылар Алматы облысында конфессияаралық ынтымақтастықты одан әрі дамытуға қатысты ұсыныстарын ортаға салды.
Жиында діни сенім бостандығын құрметтеу, қоғамдық келісімді сақтау және рухани құндылықтарды дәріптеу мәселелері өңірдің тұрақты дамуы үшін маңызды екені айтылды.
Түрлі мәдениет пен діни көзқарас өкілдерінің өзара түсіністік жағдайында өмір сүруі қоғамдағы сенімді арттырып, бірлік пен ынтымақты нығайтуға ықпал етеді.
Іс-шара соңында өңірдегі конфессияаралық келісімді нығайтуға және дінаралық диалогты дамытуға үлес қосқан Діни бірлестіктер көшбасшылары клубының белсенді мүшелеріне арнайы Алғыс хаттар табысталды.
