Қадағалау органы 2019–2024 жылдар аралығында әлеуметтік осал топтағы азаматтарды баспанамен қамтамасыз ету үшін жүргізілген мемлекеттік сатып алулардың заңдылығын тексерген.
Тексеру барысында жалпы құны 596 миллион теңгеден асатын 55 тұрғын үйді сатып алу рәсімдері зерделенді.
Прокуратураның мәліметінше, жауапты тұлғалар тұрғын үйлердің бағасын әдейі қымбаттатып көрсеткен. Кейін артық бөлінген бюджет қаражатын қолма-қол ақшаға айналдырып, өзара бөліскені анықталған.
«Талдау барысында баспана бағасын қолдан өсіріп, кейін бюджет қаражатын қолма-қол ақшаға айналдыру және оны сыбайластар арасында бөліске салу схемасы әшкереленді. Сотқа дейінгі тергеп-тексеру барысында мемлекетке 101,4 млн теңге шығын келтірілгені анықталды», – делінген прокуратура хабарламасында.
Аталған дерек бойынша қылмыстық іс қозғалып, сотқа жолданған.
Сот үш адамды Қазақстан Республикасы Қылмыстық кодексінің 189-бабы бойынша кінәлі деп танып, 7 жылдан 8 жылға дейін бас бостандығынан айыру жазасын тағайындады. Сонымен қатар сотталғандарға белгілі бір лауазымдарды атқаруға өмір бойына тыйым салынды.
Алайда сот үкімі әзірге заңды күшіне енген жоқ.
