Биыл байқауға Алматы облысының барлық аудандары мен қалаларынан 146 отбасы қатысып, олардың арасынан 12 отбасы облыстық кезеңнің үздіктері қатарынан көрінді.
Байқау қорытындысы бойынша тоғыз отбасы ынталандыру марапатына ие болса, үш отбасы жүлделі орындарды иеленді.
Бірінші орын Кеген ауданынан қатысқан Бақашовтар отбасына бұйырды. Екінші орынды Жамбыл ауданындағы Асқаровтар отбасы иеленсе, үшінші орын Іле ауданынан келген Тинибаевтар отбасына берілді.
Салтанатты шараға Алматы облысы әкімінің орынбасары Ғани Майлыбаев қатысып, байқау жеңімпаздары мен жүлдегерлерін құттықтады.
«Мерейлі отбасы» ұлттық конкурсының негізгі мақсаты – отбасы институтының беделін арттыру, ұлттық және отбасылық құндылықтарды дәріптеу, ұрпақтар сабақтастығын нығайтып, қоғамға үлгі болар өнегелі отбасылардың тәжірибесін кеңінен насихаттау.
Шара барысында жеңімпаздар мен жүлдегерлерге марапаттар табысталып, үздік отбасылар естелік суретке түсті. Салтанатты рәсім мерекелік концерттік бағдарламамен жалғасты.
