Төтенше жағдайлар министрлігінің мәліметінше, оқиға Қарасай ауданында, Үлкен Алматы шыңының маңында болған. Ағалы-қарындас екі турист таудан түсу кезінде ауа райының күрт бұзылуына байланысты бағытынан жаңылған.
Түсу барысында қатты жаңбыр жауып, тауды қою тұман басқан. Салдарынан туристер әрі қарай қай бағытта жүру керегін анықтай алмай, таудан өздігінен түсу мүмкін болмаған соң құтқарушылардан көмек сұраған.
Шақырту бойынша ТЖМ Республикалық «Барыс» құтқару қызметінің мамандары іздестіру жұмыстарына кірісті. Құтқарушылар туристерді тауып, қауіпсіз бағытпен автокөлік тұрған жерге дейін алып түсті. Кейін олар қалаға жеткізілді.
Туристерді Апаттар медицина орталығының мамандары тексерді. Олардың жағдайы қанағаттанарлық, медициналық көмек қажет болмаған.
