Сынақ аясында Auto Flight компаниясының жолаушылар тасымалына арналған eVTOL тік ұшып-қонатын электр аппараты таныстырылады. Қазіргі уақытта қала аумағында жаңа буындағы әуе көліктерінің тестілік ұшулары басталып кеткен.
Алматы облысы әкімдігінің мәліметінше, мамандар пилоттық кезеңде жолаушылар әуе аппараттарының мүмкіндіктерін, жүктерді дрон арқылы жеткізу жүйесін және қала ішіндегі әуе қозғалысын цифрлық басқару технологияларын (UATM) тексеріп жатыр.
Жобаға Оңтүстік Корея, Италия және Қытай елдерінің халықаралық серіктестері қатысуда. Демонстрациялық ұшулар мен сынақтарды қазақстандық Alatau Advance Air Group компаниясы мемлекеттік органдармен бірлесіп ұйымдастырып отыр.
Әкімдік өкілдері барлық ұшулар уәкілетті органдармен келісілгенін және қауіпсіздік талаптары толық сақталатынын атап өтті.
Сынақтар қалалық әуе мобильдігін дамыту тұжырымдамасы (Urban Air Mobility) аясында жүзеге асырылуда. Бастама Алатау қаласын жоғары технологиялық, экологиялық таза және инновациялық мегаполис ретінде дамыту стратегиясының бір бөлігі саналады.
