Мәліметке сәйкес, Қазақстан Республикасы Үкіметінің 2026 жылғы 18 ақпандағы №88 қаулысымен референдум өткізуге 20 777,5 миллион теңге қарастырылған. Оның ішінде 20 653,9 миллион теңге Орталық сайлау комиссиясына бағытталды.
Бөлінген қаржының негізгі бөлігі – 15 698 миллион теңге немесе 75 пайызы барлық деңгейдегі референдум комиссияларының 71 044 мүшесінің еңбекақысын төлеуге жұмсалады. Ал 4 956 миллион теңге немесе 25 пайызы ұйымдастыру іс-шараларына, атап айтқанда ақпараттық сүйемелдеу, полиграфиялық және баспа өнімдерін әзірлеу, сондай-ақ комиссиялардың жұмысын қамтамасыз етуге бағытталмақ.
Сонымен қатар Сыртқы істер министрлігіне 123,6 миллион теңге бөлінген. Бұл қаражат 62 елдегі 80 шетелдік дауыс беру учаскесінде қызмет ететін мамандарды іссапарға жіберуге арналған.
Қаржы министрлігі референдумға байланысты іс-шараларды қаржыландыруға халықаралық ұйымдардың, шетелдік мемлекеттік органдардың, заңды тұлғалар мен азаматтардың, сондай-ақ азаматтығы жоқ адамдардың тікелей немесе жанама түрде қатысуына заңмен тыйым салынатынын атап өтті.
