Мәліметке сәйкес, қаржы Мемлекет басшысының Каспийді кешенді зерделеу, теңіздің экологиялық тұрақтылығын сақтау және өңірдегі ғылыми зерттеулерді күшейту жөніндегі тапсырмаларын орындау аясында бөлінген. Қаражат Үкімет резервінен «Каспий теңізі Қазақ ғылыми-зерттеу институты» АҚ-ға бағытталмақ.
Үкімет хабарламасында қаржыландыру институттың ғылыми әлеуетін арттыруға мүмкіндік беретіні атап өтілді. Атап айтқанда, теңізде мониторинг жүргізуге арналған негізгі жабдықтарды сатып алу, сондай-ақ гидробиологиялық және гидрохимиялық зертханаларды заманауи құралдармен жабдықтау жоспарланып отыр. Бұл Каспий теңізінің қазақстандық секторындағы табиғи процестер бойынша ғылыми негізделген дерекқор қалыптастыруға жол ашады.
Қазіргі таңда ғылыми-зерттеу институты халықаралық ғылыми қауымдастықпен байланысын нығайтып, Каспий маңы елдерінің университеттері мен зерттеу орталықтары қауымдастығына кірген. Мамандар тиімді экологиялық шешімдер әзірлеу үшін бірлескен зерттеулер жүргізіп жатыр.
Қаулыны жүзеге асыру мақсатында Экология және табиғи ресурстар министрлігіне барлық қажетті шараларды қабылдау тапсырылды. Ал Қаржы министрлігіне бөлінген бюджет қаражатының мақсатты әрі тиімді пайдаланылуына қатаң бақылау жүргізу міндеттелген.
