Жаңа вице-министр цифрландыру, электронды өнеркәсіп және жасанды интеллект салаларында еңбек еткен тәжірибелі мамандардың бірі саналады. Ол бұған дейін мемлекеттік органдарда түрлі басшылық қызметтерді атқарған.
Ғиззат Байтұрсынов 1994 жылы Шымкент қаласында дүниеге келген. Малайзиядағы Asia Pacific University of Technology & Innovation университетін және Д.А. Қонаев атындағы Еуразия заң академиясы тәмамдаған.
Еңбек жолын бағдарламашы ретінде бастаған ол 2010–2019 жылдар аралығында жеке секторда және халықаралық бағыттағы жобаларда жұмыс істеді. Әр жылдары «Ел-Қонды» ЖШС-ның Малайзиядағы өкілі, техникалық жабдықтау бөлімінің басшысы және мемлекеттік сатып алу бөлімінің бас маманы қызметтерін атқарған.
2019 жылы мемлекеттік қызметке ауысып, сол кездегі Қазақстан Республикасының Цифрлық даму, инновациялар және аэроғарыш өнеркәсібі министрлігі құрылымында жұмысын бастады. Алғашында Электрондық өнеркәсіпті дамыту департаментінде сарапшы, кейін бас сарапшы және басқарма басшысы лауазымдарын атқарды.
2022–2024 жылдары аталған министрліктің Электрондық өнеркәсіпті дамыту департаментінде директордың орынбасары және директор қызметтерінде болды.
Ал 2024–2026 жылдары Жасанды интеллект және инновацияларды дамыту комитетін басқарды. Осы кезеңде еліміздегі жасанды интеллект экожүйесін дамытуға, цифрлық шешімдерді енгізуге және инновациялық жобаларды қолдауға бағытталған жұмыстарға жетекшілік етті.
2026 жылдың наурыз айынан бастап қазіргі уақытқа дейін жаңадан құрылған Қазақстан Республикасының Жасанды интеллект және цифрлық даму министрлігі жанындағы Цифрлық активтер және серпінді технологиялар комитетінің төрағасы қызметін атқарды.
Енді жаңа лауазымында Ғиззат Байтұрсынов еліміздегі жасанды интеллект технологияларын дамыту, цифрлық трансформацияны жеделдету және инновациялық саясатты іске асыру бағытындағы жұмыстарға жауапты болады.
