Ғылым және жоғары білім министрі Саясат Нұрбек Қазақстан үкіметі уақыт белдеуінің әсерін зерттеуге 100 миллион теңгеден астам қаражат бөлуді жоспарлап отырғанын мәлімдеді, деп хабарлайды alataunews.kz.
Министрдің айтуынша, зерттеу үшін бастапқыда 160 миллион теңге көлемінде өтінім берілген, алайда бұл сома қысқаруы ықтимал.
«Өтінім үш жылдық бюджетке 160 миллион теңге көлемінде ұсынылған. Бірақ нақтылаудан кейін шамамен 90-100 миллион теңге бөлінеді деп ойлаймын,» – деді Саясат Нұрбек.
Зерттеудің нақты алгоритмі әзірге белгісіз. Министрдің сөзінше, бұл бағытта физиология және география институттары жұмыс істейтін болады.
«Бұл сауалнама арқылы емес, басқа ғылыми әдістермен жүргізіледі. Конкурс өткізілгеннен кейін ғана нақты қандай тәсілдер қолданылатыны белгілі болады,» – деп нақтылады министр.
Саясат Нұрбек зерттеу үшін қаражат босқа жұмсалмайтынын атап өтті.
«Қазақстанда бірыңғай уақыт белдеуін сақтау туралы шешім қабылданғанына қарамастан, бұл зерттеу қоғам тарапынан туындаған сұранысқа негізделген. Денсаулық сақтау министрлігі жобаны толық қолдап отыр. Біз де гранттық қаржыландыру ұйымы ретінде бұл бастаманы қолдадық,» – деді министр.
Зерттеудің нақты құнын Ұлттық ғылыми кеңес анықтайды. Жуырда ғана өткен Жоғары ғылыми-техникалық комиссия отырысынан кейін жақында конкурс жарияланатыны белгілі болды.
Бұл зерттеу уақыт белдеуі мәселесіне қатысты ғылыми түсінік қалыптастырып, тұрғындардың денсаулығы мен күнделікті өміріне әсерін анықтауға бағытталған.
