Ведомство мәліметінше, 2026 жылғы 5–30 маусым аралығында Қазақстанның әртүрлі өңірлерінде «Найза-Антитеррор-2026» республикалық жедел-тактикалық оқу-жаттығуы ұйымдастырылуда.
ҰҚК өкілдері азаматтарды өткізіліп жатқан іс-шараларға түсіністікпен қарауға шақырды.
«2026 жылғы 5 мен 30 маусым аралығында Қазақстан Республикасының аумағында ҰҚК Терроризмге қарсы орталығы «Найза-Антитеррор-2026» терроризмге қарсы оқу-жаттығуын өткізуде. Азаматтарды жүргізіліп жатқан оқу-жаттығуға түсіністікпен қарауға шақырамыз. Жекелеген аудандарда автокөлік қозғалысын уақытша шектеу көзделген», – деп хабарлады ҰҚК баспасөз қызметі.
Терроризмге қарсы оқу-жаттығулар барысында күштік құрылымдардың өзара іс-қимылы, төтенше жағдайларға әрекет ету алгоритмдері және қауіпсіздік шаралары пысықталады.
Осыған байланысты кейбір өңірлерде жол қозғалысына уақытша шектеулер енгізілуі мүмкін.
Ведомство тұрғындарға қауіпсіздік талаптарын сақтап, құқық қорғау және арнайы органдар қызметкерлерінің заңды талаптарын орындауды ұсынды.
ҰҚК өкілдері азаматтарға тек ресми ақпарат көздеріне сенуге кеңес берді.
Сондай-ақ әлеуметтік желілер мен мессенджерлерде таралуы мүмкін жалған ақпараттарға назар аударып, расталмаған мәліметтерді бөліспеуге шақырды.
«Қауіпсіздік шараларын сақтауды және мемлекеттік орган қызметкерлерінің заңды талаптарын орындауды сұраймыз. Тек ресми ақпаратты басшылыққа алып, жалған мәліметтердің таралуына жол бермеу қажет», – деп мәлімдеді ведомство.
