«Күштік құрылымдарды қаржыландыруға 2026 жылы 3 трлн теңге жоспарланып отыр. Бұл көрсеткіш биылғы жылмен салыстырғанда 335 млрд теңгеге артық. Осылайша, қорғанысқа жұмсалатын шығыстар жалпы ішкі өнімнің шамамен 1 пайызын құрайды», — деді министр.
Мәди Тәкиевтің айтуынша, бөлінетін қаражат тек жауынгерлік дайындықты сақтау шараларына ғана емес, сонымен қатар әскери инфрақұрылымды жаңарту мен техникалық жарақтандыруға бағытталады.
Бүгін Мәжілісте депутаттар «2026–2028 жылдарға арналған республикалық бюджет туралы» заң жобасын қарап жатыр. Үкіметтің жаңа бюджет саясаты елдің қорғаныс қабілетін нығайтуға, қауіпсіздік жүйесін жетілдіруге және күштік құрылымдардың материалдық-техникалық базасын заманауи деңгейге көтеруге бағытталған.
