Марқұмның туыстары күдіктілердің бұған дейін де ауыл тұрғындарына түнгі уақытта тиісіп жүргенін айтады. Олардың сөзінше, сол түні күдіктілер Жанасыл Сәрсенбайды зираттан бастап қуып, кейін үйінің жанында інісінің көз алдында пышақтап кеткен.
Қаза тапқан жігіттің анасы Алмагүл Нұрғизат әлі күнге дейін болған жағдайға сене алмайтынын айтты.
«Ұлым жүгіріп келіп, “ағамды пышақтап кетті” деді. Мен сыртқа шықтым. Жанасыл тізерлеп отыр екен. Құшақтап алдым. Ауыр дем алып жатқанын естідім. Біз оны ауруханаға апардық. Бірақ кеш болып кеткенін айтты», – деді ол.
Оқиғаның куәгері болған марқұмның інісі қауіпсіздігі үшін жүзін көрсетуден бас тартқан.
Оның айтуынша, ағайындылар сол түні әкесінің зиратына барып, кейін үйге қайтып келе жатқан. Бір кезде жолдарын ішінде бірнеше жас отырған көлік бөгеген.
Туыстарының сөзінше, көлік жолдың ортасында есіктері ашық тұрған. Жанасыл жүргізушілерден жол беруді сұрағанымен, олар назар аудармаған. Кейін ол көлікті айналып өтпек болған.
«Біз оларды жоғары жылдамдықпен айналып өттік. Бірақ олар соңымыздан қуып, сигнал беріп отырды. Үйге дейін келдік. Олар да тоқтап, көліктен түсті. Қолдарында пышақ барын ойламадық. Біреуі үндеместен келіп, ағама екі рет пышақ сұқты. Кейін бәрі көлікке мініп, қашып кетті. Өздерін дұрыс ұстап тұрған жоқ еді. Мас болған», – деді марқұмның інісі.
Жанасыл Сәрсенбай өкпе тұсынан алған пышақ жарақатынан ауруханада көз жұмған. Оның артында бір жастағы екі қызы қалды.
Марқұмның туыстары күдіктілердің 19 және 20 жаста екенін айтты. Ауыл тұрғындарының сөзінше, жастардан көпшілік қорқып, жоламауға тырысқан.
Қазіргі уақытта үш күдікті уақытша ұстау изоляторына қамалды. Іс «Адам өлтіру» және «Бұзақылық» баптары бойынша тергеліп жатыр.
Күдіктілер 15 жылға дейін бас бостандығынан айырылуы мүмкін.
