Қонаев қаласының әкімі Асхат Бердіханов Шеңгелді ауылдық округіне барып, картоп өсірумен айналысатын «БайтерекАгроСервис» ЖШС-нің жұмысымен танысты.
Шаруашылық биыл жалпы 1 790 гектар жерді игерген. Оның 150 гектарына «Пикассо», «Аризона» және «Артемис» сұрыпты картоп егілген. Қазір алқапта өнім жинау жұмыстары жүріп жатыр. Шаруашылықтың мәліметінше, әр гектардан орта есеппен 25 тоннаға дейін өнім алынуда.
Жиналған картоп арнайы өңдеуге жіберіліп, кейін чипс өндірісінде шикізат ретінде пайдаланылады.
Серіктестіктің атқарушы директоры Қуаныш Додаевтың айтуынша, биыл шаруашылық «Кең дала» бағдарламасы арқылы жеңілдетілген несие алып, өндіріс үшін қажетті айналым қаражатымен қамтамасыз етілген.
«Осы қаржының арқасында жанар-жағармай, тұқым, тыңайтқыш және ауыл шаруашылығы қызметтеріне қажетті шығындарды уақытылы өтеуге мүмкіндік алдық. Алдағы уақытта элиталы картоп егілетін алқап көлемін 200 гектарға дейін ұлғайтуды жоспарлап отырмыз», – деді Қуаныш Додаев.
Шеңгелдіде картоп алқаптарының көлемі де айтарлықтай артқан. Қонаев қалалық ауыл шаруашылығы бөлімінің басшысы Асқар Ибраимовтың мәліметінше, биыл ауылдық округ шаруалары жалпы 313 гектар жерге картоп еккен. Бұл өткен жылмен салыстырғанда үш есе көп.
Ауыл шаруашылығында дақылдарды әртараптандыру жұмыстары да жүргізілуде. Былтыр пияз егілген алқаптардың бір бөлігіне биыл бақша, майлы, дәнді және бұршақ дақылдары орналастырылған. Соның нәтижесінде Шеңгелдіде 13 мың гектардан астам жер игерілді.
«Қазіргі таңда қауын-қарбыз, жоңышқа, ерте пісетін бидай мен арпаны жинау аяқталды. Алда пияз жинау және күзгі дала жұмыстары тұр», – деді Асқар Ибраимов.
Сонымен қатар биыл «Кең дала» бағдарламасы аясында Шеңгелді шаруалары ұсынған төрт өтінім мақұлданған.
Шаруашылық жұмысымен танысқан Қонаев қаласының әкімі Асхат Бердіханов ауыл шаруашылығын дамыту мен жергілікті кәсіпкерлердің бастамаларын қолдау бағытындағы жұмыстар жалғасатынын атап өтті.
Шеңгелдіде картоп егістігінің ұлғаюы және жергілікті өнімнің ірі өндіріске жеткізілуі ауыл шаруашылығы өнімдерін өткізу нарығын кеңейтуге және өңірдегі агробизнесті дамытуға мүмкіндік береді.
