Сенат төрағасы Мәулен Әшімбаевтың жетекшілігімен Палата бюросының отырысы өтіп, онда 7 қараша күні өтетін Сенат отырысының күн тәртібі бекітілді. Сонымен қатар, сенаторлардың аймақтарда ұйымдастырылатын көшпелі отырыстарына дайындық мәселелері қаралды, деп хабарлайды alataunews.kz.
Алдағы бейсенбіде Сенат «Қазақстан Республикасының кейбір заңнамалық актілеріне сот жүйесін реформалау және процестік заңнаманы жетілдіру мәселелері бойынша өзгерістер мен толықтырулар енгізу туралы» заңды талқылайды. Бұл заң сотта қорғалу құқығының құқықтық кепілдіктерін күшейтуге және сот жүйесінің сапасын арттыруға бағытталған заңнамалық тетіктерді енгізуді көздейді.
Сонымен қатар, биыл маусым айында қабылданған Конституциялық заң аясында дербес кассациялық соттар құру мәселелері қарастырылады. Осыған орай, Қылмыстық-процестік, Азаматтық процестік, Әкімшілік рәсімдік-процестік кодекстеріне және өзге де заңдарға түзетулер енгізу жоспарланған.
Апта барысында сенаторлар құқық бұзушылықтардың алдын алу және қоғамдық қауіпсіздікті қамтамасыз ету бойынша Ақмола облысында, сондай-ақ аэроғарыш саласының дамуына қатысты Қызылорда облысында көшпелі отырыстар өткізеді. Сондай-ақ, олар «Прокуратура туралы» Конституциялық заңды іске асыруға, агроөнеркәсіп кешенін дамытуға арналған кездесулерге қатыспақ.
Бюро отырысында Мәжілістен түскен заң жобалары тұрақты Комитеттерге бөлініп берілді.
