Сапар өңірдегі эпидемиологиялық ахуалды бағалау және қызметтің тиімділігін арттыруға бағытталған.
Жұмыс сапары облыс әкімінің орынбасары Ғ.А. Майлыбаев төрағалығымен өткен денсаулық сақтау басқармасының алқа отырысынан басталды. Жиында қазіргі эпидемиологиялық жағдай және оны тұрақтандыру шаралары талқыланды. Комитет төрағасы саладағы өзекті мәселелерге талдау жасап, алдағы жұмыстың басым бағыттарын айқындады.
Сапар аясында С. Бейсенова иммунобиологиялық препараттардың облыстық қоймасының жұмысымен танысып, зертхана мен санитариялық-эпидемиологиялық қызмет бөлімшелерін аралады.
Жаппай демалыс орындарының дайындығына да ерекше назар аударылды. Атап айтқанда, комитет төрағасы Қапшағай су қоймасы жағалауындағы қалалық жағажайға барып, абаттандыру жұмыстарының барысын әкімдік пен мердігер ұйым өкілдерімен бірлесіп тексерді.
Жұмыс бағдарламасы облыстың Іле және Еңбекшіқазақ аудандарында жалғасты. Мұнда санитариялық-эпидемиологиялық қызмет мамандарымен және сала ардагерлерімен кездесулер өтті.
Сапар барысында өңірдегі инфрақұрылымды жаңғырту жұмыстарының оң нәтижелері атап өтілді. Соңғы жылдары ғимараттар жөнделіп, материалдық-техникалық база мен автопарк жаңартылған. Бұл көрсетілетін қызмет сапасын арттырып, жүйенің тиімділігін күшейтуге мүмкіндік беріп отыр.
Комитет төрағасының Алматы облысына жұмыс сапары ертең де жалғасады.
