Фестиваль аясында ұлттық спорт түрлерінен жарыстар ұйымдастырылып, жеңімпаздар қомақты сыйлықтармен марапатталды.
Мерекенің ең әсерлі сәттерінің бірі – Қарқара жайлауында ұйымдастырылған мың жылқының шеруі болды.
Жер дүбірлеткен сәйгүліктердің көрінісі фестиваль қонақтарының ерекше қызығушылығын тудырып, ұлттық рухты асқақтатқан көрініске айналды.
Фестиваль аясындағы басты бәсекелердің бірі – ат бәйгесі болды.
Биыл бәйгеге еліміздің әр өңірінен келген 200-ге жуық шабандоз қатысты.
Жарыс үш қашықтық бойынша ұйымдастырылды:
- 9 шақырым – құнан бәйге;
- 20 шақырым – топ бәйге;
- 32 шақырым – аламан бәйге.
Бәйгенің жүлде қоры да қомақты болды.
Аламан бәйгенің жеңімпазы Jetour X70 FL Prestige автокөлігінің иегері атанды.
Сонымен қатар:
- ІІ орынға – 2,5 миллион теңге;
- ІІІ орынға – 1 миллион теңге табысталды.
«Түйе палуан» мен «Алыптар сайысы» көрермен қызығушылығын тудырды
Фестиваль бағдарламасына қазақтың дәстүрлі күш сынасу ойындары да енді.
«Түйе палуан» сайысында балуандар өзара мықтыны анықтаса, «Қошқар көтеру» жарысында қатысушылар күш пен төзімділіктерін көрсетті. Дәстүр бойынша қошқарды ең көп көтерген спортшы оны өз жүлдесі ретінде алып кетті.
Ал «Алыптар сайысында» қатысушылар найза лақтыру, темір шыбық ию, ауыр тасты көтеру, 100 келілік бөренемен жаттығу жасау және 500 келілік арбаны сүйреу сияқты күрделі тапсырмаларды орындады.
Сайыс жеңімпазы 1,5 миллион теңге көлеміндегі бас жүлдені иеленді.
Ұлттық ойындар кеңінен насихатталды
Негізгі жарыстардан бөлек фестивальде қол күресі, арқан тарту, тоғызқұмалақ, шахмат, қой қырқу және көшпелі өмір салтымен байланысты басқа да ұлттық ойындар ұйымдастырылды.
Биыл бесінші рет ұйымдастырылған мереке қазақ халқының рухани мұрасын насихаттап, ұлттық құндылықтарды ұлықтайтын ірі республикалық іс-шаралардың бірі ретінде өз мәресіне жетті.
