Алматы облысының дін қызметкерлерінің айтуынша, Құрбан айт – тарихы тереңнен бастау алатын қасиетті мереке. Бұл күндері адамдар бір-бірін құттықтап, жақындарына қуаныш сыйлап, туыстарын аралап, әсіресе балаларға ерекше көңіл бөлгені жөн.
Құрбандыққа шалынатын мал дені сау әрі қоңды болуы тиіс. Қойды бір адам шалса, сиыр немесе түйені жеті адамға дейін бірігіп шалуға болады.
Алматы облысының санитариялық дәрігерлері, полиция қызметкерлері және әкімдік өкілдері құрбандық шалу рәсімі тек арнайы жабдықталған орындарда өткізілуі керектігін ескертеді. Биыл өңірде осындай 19 арнайы алаң дайындалады. Бұл орындарда барлық қауіпсіздік және ветеринариялық талаптар сақталады.
Мамандар тұрғындарды малды стихиялық базарлардан сатып алмауға шақырады.
Ал құрбандық шалу рәсімін тұрғын үйлердің аулаларында, адам көп жиналатын орындарда өткізуге қатаң тыйым салынады. Мамандардың айтуынша, мұндай әрекеттер тек айыппұлға әкеліп қана қоймай, тұрғындардың денсаулығына да кері әсер етуі мүмкін.
Сондай-ақ тазалық пен тәртіпті сақтау маңызды екені айтылды. Себебі бұл тек мерекенің сәні ғана емес, тұрғындардың жеке қауіпсіздігінің де кепілі.
