Қорғаныс министрінің нұсқаулары мен бұйрықтарына өзгерістер енгізу жоспарланып отыр. Бұл туралы ақпарат “Ашық НҚА” порталында жарияланды, деп хабарлайды alataunews.kz.
Министр бұйрығының жобасымен толық танысу мүмкіндігі 5 желтоқсанға дейін “Ашық НҚА” сайтында ұсынылған.
Ведомство мәліметінше, әскери қызметті реттейтін кейбір бұйрықтарға құқықтық мониторинг жүргізу барысында іс жүзінде қолданылмайтын нормалар анықталған. Соның бірі – құқық қорғау және арнайы органдардан Қарулы Күштерге ауысатын қызметкерлерге базалық курстардан өту талабына қатысты.
“Мұндай жағдайлар өте сирек кездесетіні, ауысу мерзімдерінің нақты белгіленбегені және белгілі бір сала мамандарының қажеттілігі ескеріліп, аталған курстарды талап етпей-ақ қайта аттестациялауға алу ұсынылады. Осыған байланысты, жоба бұйрығынан бұл норманы алып тастау көзделіп отыр”, – делінген Қорғаныс министрлігінің хабарламасында.
