Мерекелік іс-шараға Алматы облысының әкімі Марат Сұлтанғазиев қатысып, тұрғындар мен қала қонақтарын Ұлыстың ұлы күнімен құттықтады.
Аймақ басшысы алдымен роботтар көрмесі мен «Жеті қазына» интерактивті жобасын тамашалады. Сондай-ақ департаменттер мен басқармалар тіккен киіз үйлерді аралап, ұлттық киімдегі жастардың театрландырылған қойылымдарын көрді. Этноауыл аумағында қала тұрғындарына наурыз көже ұсынылып, ұлттық тағамдардан дәм татуға мүмкіндік жасалды.
Салтанатты жиында сөз сөйлеген өңір басшысы Наурыз мерекесінің маңызын атап өтті.
«Бүгінгі мереке – халқымыздың бай мәдениеті мен ізгі дәстүрлерінің сабақтастығын айшықтайтын ерекше күн. Мемлекет басшысы Қасым-Жомарт Тоқаевтың бастамасымен Наурыз мейрамы жаңа мазмұнға ие болып, «Наурызнама» тұжырымдамасы аясында 10 күндік мерекеге айналды. Бұл – ұлттық құндылықтарды жаңғыртудың айқын көрінісі. Бүгін біз осы онкүндіктің маңызды күндерінің бірі – Ынтымақ күнін атап өтіп отырмыз», – деді Марат Сұлтанғазиев.
Іс-шара барысында бірқатар азаматтарға мерекеге орай марапаттар табысталды.
Мерекелік бағдарлама эстрада әншілері мен жергілікті өнерпаздардың концертімен жалғасты. Олар жиналған жұртқа көтеріңкі көңіл күй сыйлады.
Сонымен қатар, облыс әкімі Қонаев қаласындағы балалар үйіне арнайы барып, тәрбиеленушілермен бірге 40 түп ағаш көшетін отырғызды. Ол «Таза Қазақстан» бағдарламасының маңызын айтып, өңірде көгалдандыру жұмыстары жалғасатынын жеткізді.
Кейін балаларды Наурыз мерекесімен құттықтап, олармен бірге наурыз көжеден дәм татып, концерт тамашалады.
Айта кетейік, Қонаевтағы балалар үйі өткен жылы жеке инвестор есебінен салынған. 180 орынға арналған мекемеде барлық қажетті жағдай жасалған. Мұнда асханалар, спорт және мәжіліс залдары, ойын және демалыс аймақтары, кітапхана мен медициналық кабинеттер қарастырылған. Сондай-ақ балалардың шығармашылық қабілетін дамытуға арналған арнайы кабинеттер бар.
