Синоптиктердің мәліметінше, алдағы айда еліміздің басым бөлігінде өте ыстық ауа райы сақталып, кей өңірлерде ауа температурасы +50 градусқа дейін көтерілуі ықтимал.
Метеорологтар шілде дәстүрлі түрде Қазақстандағы жылдың ең ыстық айы болатынын айтады. Осы кезеңде елдің солтүстік және шығыс өңірлерінде орташа ауа температурасы +18…+23 градус аралығында болса, оңтүстік облыстарда +28…+30 градусқа дейін жетеді.
Болжам бойынша, солтүстік және шығыс аймақтарда ауа температурасы +42…+43 градусқа дейін көтерілсе, орталық, батыс және оңтүстік-шығыс өңірлерде +47…+48 градусқа дейін жетуі мүмкін. Ал еліміздің оңтүстігінде сынап бағаны +50 градусқа дейін көтерілуі ықтимал.
Дегенмен синоптиктер шілде айы тек аптап ыстықпен шектелмейтінін атап өтті. Кей кезеңдерде қысқа мерзімді салқындау байқалып, әсіресе солтүстік және шығыс өңірлерде түнгі температураның +5 градусқа дейін төмендеуі мүмкін.
Мамандар Қазақстанның солтүстік бөлігінде шілде айы жылдың ең жауын-шашынды кезеңдерінің бірі саналатынын айтады. Бұл өңірлерде жаңбыр көбіне найзағаймен қатар жүреді, кей жерлерде нөсер түрінде жаууы ықтимал.
Синоптиктер жекелеген аудандарда бір тәуліктің ішінде айлық нормамен тең немесе одан да көп жауын-шашын түсуі мүмкін екенін ескертеді. Мұндай жағдайлар су басу қаупін арттырып, тұрғындар мен коммуналдық қызметтерден ерекше дайындықты талап етеді.
Ең жоғары найзағай белсенділігі елдің солтүстік, шығыс және таулы аймақтарында күтіледі. Ал оңтүстік-шығыстағы таулы өңірлерде бұршақ жауу ықтималдығы жоғары.
