Компания мәліметінше, еліміздің республикалық жолдары бойында мыңдаған жүргізуші мен жолаушыға қызмет көрсететін жылы және салқын санитарлық тораптар жұмыс істейді. Алайда кейбір азаматтар кезек күткісі келмей, дәретхана ғимаратының сыртына дәрет сындыратын жағдайлар жиі кездеседі.
Осыған байланысты «ҚазАвтоЖол» жол қозғалысына қатысушыларды қоғамдық орындардағы мәдениетті сақтауға шақырды.
Компания жүргізушілер мен жолаушыларға:
- санитарлық тораптарды пайдалануға;
- қоқыс пен дәретхана қағазын айналаға тастамауға;
- ортақ пайдаланылатын мүлікке ұқыпты қарауға;
- жол бойындағы тазалықты күн сайын қамтамасыз ететін қызметкерлердің еңбегін құрметтеуге кеңес берді.
Ұлттық компанияның айтуынша, жол бойындағы тазалық әрбір азаматтың жауапкершілігіне байланысты.
Айта кетейік, Қазақстанда жол бойындағы санитарлық тораптардың санын көбейту мәселесі өзекті күйінде қалып отыр. Биыл наурыз айында Ақмола облысында республикалық автожолдар бойына 13 жаңа дәретхана орнатылатыны хабарланған болатын.
