Еңбек және халықты әлеуметтік қорғау министрлігінің мәліметінше, маусым айымен салыстырғанда бос жұмыс орындарының саны 3,8 пайызға азайған, ал түйіндемелер саны 11,5 пайызға артқан. Мамандар бұл үрдісті жаз мезгіліндегі маусымдық ерекшелікпен байланыстырады. Осы кезеңде жоғары және техникалық оқу орындарының түлектері еңбек нарығына белсенді шығып, жұмыс іздеушілер қатары көбейеді.
Ең көп қызметкер қай салаларға қажет?
Шілде айында кадрларға ең жоғары сұраныс білім беру саласында тіркелді. Бұл бағытта 23,4 мың бос жұмыс орны ұсынылған.
Сонымен қатар қызметкерлерге сұраныс жоғары болған салалар қатарында:
- қызмет көрсету саласы – 16 мың бос жұмыс орны;
- денсаулық сақтау және әлеуметтік қызмет көрсету – 10,3 мың;
- ауыл, орман және балық шаруашылығы – 8,2 мың;
- өңдеу өнеркәсібі – 6,8 мың;
- құрылыс саласы – 5,7 мың бос жұмыс орны.
Ең көп бос жұмыс орны Астанада
Өңірлер арасында ең көп вакансия Астана қаласында жарияланған. Елордада бір ай ішінде 8,8 мың бос жұмыс орны ұсынылды.
Одан кейінгі орындарда:
- Түркістан облысы – 7,6 мың;
- Павлодар облысы – 7,1 мың;
- Алматы қаласы – 7 мың;
- Ақмола облысы – 6,9 мың бос жұмыс орны.
Жұмыс берушілер кімдерді іздейді?
Жұмыс берушілердің негізгі сұранысы орта деңгейдегі біліктілігі бар мамандарға бағытталған. Мұндай вакансиялар барлық ұсыныстың 38,8 пайызын құрады.
Ал төмен біліктілікті қажет ететін жұмыстардың үлесі 30,7 пайыз, жоғары білікті мамандарға арналған бос жұмыс орындарының үлесі 30,5 пайыз болды.
Жұмыс іздеушілердің жартысынан көбі – жастар
Шілде айында Enbek.kz платформасына жүктелген 141,2 мың түйіндеменің 54 пайызы 35 жасқа дейінгі азаматтарға тиесілі болды. Бұл көрсеткіш жаз мезгілінде оқу орындары түлектерінің еңбек нарығына белсенді шығуымен түсіндіріледі.
Жас ерекшелігі бойынша:
- 35–44 жас – 25%;
- 45–54 жас – 14%;
- 55 жастан жоғары – 7%.
Гендерлік бөліністе түйіндемелердің 57 пайызын әйелдер, 43 пайызын ерлер жариялаған.
Біліктілік деңгейі бойынша орта және жоғары білікті мамандардың әрқайсысының үлесі 38 пайыздан, ал төмен білікті жұмыс іздеушілердің үлесі 24 пайызды құрады.
Ең жоғары жалақы қандай мамандарға ұсынылды?
Шілде айында ең жоғары жалақы бағдарламалық қамтамасыз ету архитекторы лауазымына ұсынылған. Бұл қызметтің айлық еңбекақысы шамамен 1,12 миллион теңгені құрады.
Сондай-ақ жоғары жалақы ұсынылған мамандықтар:
- ұшу қауіпсіздігі жөніндегі инженер-инспектор – 910 мың теңге;
- маркетинг және өнімді өткізу бөлімінің бастығының орынбасары – 900 мың теңге.
Ал жұмыс іздеушілер арасында ең жоғары жалақыны:
- ұшқыштар – 2,39 миллион теңге;
- стюардессалар – 1,43 миллион теңге;
- электр станциясының бастығы қызметіне үміткерлер – 1,32 миллион теңге көлемінде күткен.
Жыл басынан бері Enbek.kz платформасында 709 мың бос жұмыс орны жарияланып, 877,2 мың түйіндеме орналастырылған. Бұл еңбек нарығында жұмыс іздеушілер белсенділігінің жоғары деңгейде сақталып отырғанын көрсетеді.
