Синоптиктердің мәліметінше, алдағы күндері Қазақстанның басым бөлігінде ауа райының құбылмалы сипаты сақталады. Ел аумағында жаңбыр жауып, найзағай ойнайды, кей өңірлерде бұршақ түсіп, екпінді жел соғуы мүмкін.
Болжамға сәйкес, 30 сәуірде еліміздің оңтүстік-батысы мен солтүстік-батысында қатты жаңбыр күтіледі. Ал 2 мамырда нөсер жауын оңтүстік және оңтүстік-шығыс өңірлерді қамтуы мүмкін.
Синоптиктер 30 сәуірде солтүстік және орталық өңірлерде, сондай-ақ бүкіл кезең бойы шығыс облыстарда жауын-шашынсыз ауа райы болатынын хабарлады. Ал оңтүстік өңірлерде шаңды дауыл күтіледі. Сонымен қатар республика бойынша түнгі және таңғы уақытта тұман түсуі мүмкін.
Мамандар үсік қаупі сақталатынын да ескертті. Бүкіл кезең бойы батыс өңірлерде, 30 сәуірде шығыста, 30 сәуір мен 2 мамырда солтүстік-батыста, ал 2 мамырда елдің солтүстігінде түнгі уақытта ауа температурасы 3 градусқа дейін төмендеп, үсік жүруі ықтимал.
Күндіз бірқатар өңірде ауа температурасы көтеріледі. Оңтүстік-батыста +17…+22 градусқа дейін, солтүстік-батыста +13…+25 градусқа дейін жылынады. Шығыс пен оңтүстік-шығыста +25…+32 градусқа дейін ыстық болады.
Ал батыста температура +10…+15 градусқа дейін төмендейді. Солтүстікте +12…+18 градус, орталықта +15…+25 градус, ал оңтүстікте +18…+23 градус шамасында болады.
Синоптиктер тұрғындарға ауа райының күрт құбылуына байланысты сақ болуға және дауылды ескертулерді бақылап отыруға кеңес берді.
