Бұл туралы 2026 жылғы 21 сәуірде өткен Үкіметтегі баспасөз мәслихатында Еңбек және халықты әлеуметтік қорғау министрі Асқарбек Ертаев мәлімдеді.
Министрдің айтуынша, инватакси қызметіне қатысты өзгерістер пакеті әзірленіп, құжат Қазақстанның Көлік министрлігіне жолданған. Қазіргі таңда қызмет көрсетілетін ауру түрлерінің тізімі қайта қаралып, олардың ауырлық деңгейіне қарай нақтыланған. Сонымен қатар қызмет көрсету уақытының көлемін өзгерту мәселесі де қарастырылып жатыр.
«Инватакси ең алдымен I топтағы мүгедектігі бар, яғни тұрақты түрде оңалту орталықтарына баруды қажет ететін азаматтарға бағытталуы тиіс. Ал II және III топтағы азаматтар қоғамдық көлікті пайдалана алады, сондықтан бұл қызмет барлық санатты толық қамти алмайды», – деді министр.
Сондай-ақ Асқарбек Ертаев кей жағдайларда инватакси қызметі мақсатсыз пайдаланылып жатқанын атап өтті. Осыған байланысты қолжетімділік талаптарын нақтылау және бақылауды күшейту көзделіп отыр.
Министрдің сөзінше, Көлік министрлігі әзірлеп жатқан тиісті бұйрыққа өзгерістер ай соңында немесе келесі айдың басында қабылдануы мүмкін. Ал Еңбек және халықты әлеуметтік қорғау министрлігінің өзгерістер пакетін маусым айында бекіту жоспарланып отыр.
