Ведомство мәліметінше, ақау құрылыс жұмыстары кезінде магистральдық талшықты-оптикалық байланыс желісінің зақымдануынан болған.
Министрлік таратқан ақпаратқа сәйкес, құрылыс техникасы халықаралық интернет-трафиктің негізгі бағыттарының бірін қамтамасыз ететін кабельді бүлдірген.
«»Қазақтелеком» АҚ ұсынған ақпарат бойынша, құрылыс жұмыстары кезінде халықаралық интернет-трафик өтетін негізгі бағыттардың біріндегі магистральдық кабель зақымданған. Мамандар трафикті жедел түрде резервтік арналарға ауыстырып, байланыстың толық үзілуіне жол бермеді», – деп хабарлады ведомство.
Оқиғадан кейін байланыс операторлары резервтік жүйелерді іске қосып, желінің тұрақты жұмысын қамтамасыз етуге кіріскен. Соның арқасында интернет толық өшірілмей, тек жекелеген сервистердің жұмысында уақытша қиындықтар байқалған.
Қазіргі уақытта зақымданған учаскеде қалпына келтіру жұмыстары жалғасып жатыр. Мамандар кабель желісін толық қалпына келтіру үшін қажетті техникалық шараларды жүргізуде.
Цифрлық даму министрлігі жөндеу жұмыстары аяқталғаннан кейін барлық байланыс арналары қалыпты режимде жұмыс істейтінін мәлімдеді.
