Құжатқа сәйкес, электромобильдерге жеке үлгідегі мемлекеттік нөмірлік белгілер беріледі. Тиісті норма заңның 70-бабына енгізілген.
Әзірге жаңа нөмірлердің түсі мен дизайны заңда нақты көрсетілмеген. Олардың сыртқы келбетін Ішкі істер министрлігі арнайы нормативтік-құқықтық актілер арқылы бекітеді.
Бұған дейін, 2026 жылдың мамыр айында Ішкі істер вице-министрі Санжар Әділов ведомство халықаралық тәжірибеге сүйенетінін айтқан болатын. Оның сөзінше, әлемнің көптеген елінде электромобильдердің мемлекеттік нөмірлері жасыл түспен рәсімделеді.
Мұндай тәжірибе Қытай, Норвегия, Канада, Польша және Беларусь елдерінде бұрыннан қолданыста.
Арнайы мемлекеттік нөмірлерді енгізудің басты мақсаты – электромобильдерді автоматтандырылған жүйелер арқылы жылдам анықтау. Қазіргі таңда жол камералары мен басқа да цифрлық бақылау жүйелері электр көліктерін ішкі жану қозғалтқышы бар кәдімгі автомобильдерден ажырата алмайды.
Соның салдарынан тегін автотұрақтарды пайдалану, ерекше қорғалатын табиғи аумақтарға кіру немесе электр көліктеріне арналған зарядтау орындарына қатысты жеңілдіктерді қолдану кезінде қиындықтар туындайды.
Жаңа нөмірлердің енгізілуі электромобильді инспектордың қатысуынсыз, автоматты түрде анықтауға мүмкіндік береді. Бұл өз кезегінде цифрлық сервистердің жұмысын жеңілдетіп, жеңілдіктерді беру процесін жеделдетеді.
Ішкі істер министрлігінің мәліметінше, заң күшіне енгеннен кейін арнайы мемлекеттік нөмірлерді әзірлеу мен айналымға енгізу шамамен алты айға созылады.
