Компания мәліметінше, 15 сәуірде сағат 03:00 мен 17:00 аралығында жерсеріктік, цифрлық және аналогтық эфирлік желілерде жоспарлы-профилактикалық жұмыстар жүргізіледі. Осыған байланысты еліміздің бүкіл аумағында телерадиоарналардың ретрансляциясы уақытша тоқтатылады.
«Қазтелерадио» АҚ мұндай жұмыстарды тоқсан сайын өткізеді. Бұл шаралар телерадио хабар тарату сапасын қамтамасыз ету және техникалық құралдардың тұрақты жұмысын сақтау үшін қажет.
Сондай-ақ жоспарлы жұмыстар кезінде қосымша жаңғырту және техникалық жетілдіру шаралары да қатар жүргізіледі.
Компания өкілдері уақытша қолайсыздықтар үшін тұрғындардан түсіністікпен қарауды сұрады.
