Жаңа құжатқа сәйкес, Қазақстаннан сұйытылған мұнай газын, пропан мен бутанды автомобиль және теміржол көлігімен алты ай бойы шетелге шығаруға тыйым салынады.
Министрлік түсіндірмесінде бұл шектеу ішкі нарықты қамтамасыз ету және газ тапшылығының алдын алу мақсатында енгізіліп отырғаны атап өтілді.
Экспортқа тыйым келесі жағдайларға қолданылмайды:
• Президент бекіткен өнімді бөлу жөніндегі келісімдер немесе жер қойнауын пайдалану келісімшарттары аясында өндірілген және салық режимінің тұрақтылығына ие жер қойнауын пайдаланушыларға;
• Қарашығанақ кен орнынан өндірілген қазақстандық шикізатты қайта өңдеу арқылы алынған тауарларды Қазақстанның халықаралық шарттарына сәйкес экспорттауға;
• Қазақстан аумағы арқылы транзитпен өтетін, басталуы мен аяқталуы ел аумағынан тыс тасымалдарға;
• Үкімет шешімі бойынша гуманитарлық көмек ретінде жіберілетін жүктерге.
Бұйрық 2025 жылдың 14 қарашасынан бастап күшіне енеді.
Бұған дейін бұл тыйымды ұзарту туралы шешім қазан айының басында өткен Сыртқы сауда жөніндегі ведомствоаралық комиссияның отырысында мақұлданған еді. Министрлік мұндай шектеулер ішкі нарықты тұрақтандыруға бағытталғанын мәлімдеген.
