Қаржы мониторингі агенттігі (ҚМА) өзін агенттік қызметкері ретінде таныстырып, азаматтарды алдауға тырысатын алаяқтардың әрекеті туралы ескерту жасады, деп хабарлайды alataunews.kz.
Алаяқтардың әрекет тәсілі:
- Қаскүнемдер азаматтарға қоңырау шалып, олардың шотындағы ақшаны қорғау керек деген сылтаумен жалған нұсқаулар береді.
- Өздерінің агенттік қызметкері екенін «дәлелдеу» үшін жалған куәліктер мен ҚМА логотиптері бар құжаттардың фотосуреттерін жібереді.
- Алаяқтардың ықпалына түскен азаматтар өз жинақтарын олардың шоттарына аударып жібереді.
Әлеуметтік желілердегі алаяқтық:
ҚМА атынан жалған парақшалар ашылып, азаматтарға алаяқтық жобаларға салынған ақшаларын қайтарып беру туралы ұсыныстар жасалуда. Мұндай парақшалар жеке деректерді, телефон нөмірлерін және жоғалған қаражат сомасын енгізуді сұрайды. Кейін белгісіз нөмірлерден қоңырау шалып, банк шотыңыз туралы мәліметтерді алуға тырысады.
Ресми ескерту:
ҚМА жеке тұлғаларға телефон арқылы немесе мессенджерлер арқылы хабарласпайтынын ресми түрде мәлімдеді. Агенттік азаматтарға сақ болуды, ақпаратты тек ресми дереккөздерден тексеруді және алаяқтардың арбауына түспеуді сұрайды.
