Оқиға Учхоз ауылында болған. Төтенше жағдайлар министрлігінің мәліметінше, 2016 жылы туған бала металл қоршаудан асуға әрекеттенген кезде қолын арматураға іліп алып, өздігінен босай алмаған.
Оқиға туралы хабарлама түскеннен кейін оқиға орнына ҚР ТЖМ «Барыс» республикалық жедел-құтқару жасағының мамандары жедел жеткен.
Құтқарушылар арнайы гидравликалық құралдың көмегімен металл қоршаудың бөлігін кесіп, баланы қауіпсіз түрде босатып алды.
Төтенше жағдайлар министрлігінің хабарлауынша, алғашқы көмек көрсетілгеннен кейін баланың ата-анасы оны қосымша медициналық тексеруден өткізу үшін қалалық клиникалық ауруханаға өздері жеткізген.
Ведомство өкілдері балалардың қауіпсіздігі ересектердің тұрақты бақылауы мен жауапкершілігін талап ететінін еске салды.
ТЖМ ата-аналарды балалардың ойын кезінде қауіпсіздік талаптарын сақтауына ерекше көңіл бөлуге және қауіпті орындарда қараусыз қалдырмауға шақырды.
