Оқиға Қапшағай су қоймасындағы №5 қалалық жағажай аумағында болған.
Төтенше жағдайлар министрлігінің мәліметінше, патрульдеу кезінде құтқарушылар 2009 жылы туған жасөспірімнің шомылуға тыйым салынған қалқыма белгілерінен асып кетіп, өздігінен жағаға қайта алмай қалғанын байқайды.
Құтқарушылар дереу оқиға орнына жетіп, жасөспірімді судан шығарып, қауіпсіз жерге жеткізген.
Ведомство жасөспірімнің жағдайы қанағаттанарлық екенін айтты. Оған медициналық көмек қажет болмаған.
ТЖМ мамандары азаматтарды судағы қауіпсіздік талаптарын қатаң сақтауға шақырады. Әсіресе шомылуға арналған аумақтан тыс жерлерге жүзбеу, белгіленген қалқыма белгілерінен аспау және балаларды қараусыз қалдырмау қажеттігін ескертеді.
Айта кетейік, Алматы облысында шомылу маусымы басталғалы құтқарушылар су айдындарында күнделікті рейдтер мен профилактикалық жұмыстар жүргізіп келеді. Мамандардың айтуынша, қайғылы оқиғалардың басым бөлігі қауіпсіздік ережелерін сақтамаудан болады.
