Ал 10 шілдеде Нарынқол ауылында қазақ поэзиясының классигі, Хан Тәңірінің түлегі Мұқағали Мақатаевтың шығармашылығына арналған ғылыми-танымдық конференция өтеді. Басқосуда ақын мұрасы, оның қазақ әдебиетіндегі орны мен шығармаларының рухани құндылығы талқыланады. Конференцияға белгілі ақын-жазушылар, әдебиеттанушылар мен зиялы қауым өкілдері қатысады.
Сол күні кешкісін аудан орталығында мерейтойлық гала-концерт ұйымдастырылады. Мерекелік кеште қазақстандық эстраданың танымал өнерпаздары Еркеш Хасен, Әбдіжаппар Әлқожа, Нұрсұлтан Нұрбердиев пен Баян Сұлу өнер көрсетеді.
Мерейтойлық шаралардың шарықтау шегі 11 шілдеде Шалкөде жайлауында өтетін «Хантәңірі қазынасы» халықаралық этнофестивалі болмақ.
Табиғаты көркем, туристік әлеуеті жоғары Шалкөде жайлауында ұйымдастырылатын фестиваль ұлттық құндылықтарды дәріптеуге, көшпенділер мәдениетін насихаттауға және этнотуризмді дамытуға бағытталған.
Фестиваль бағдарламасында ұлттық өнер, дәстүрлі мәдениет, қолөнер көрмелері мен этноауылдар таныстырылып, қонақтарға қазақ халқының бай мұрасын жақыннан тануға мүмкіндік беріледі.
Сондай-ақ фестиваль аясында ұлттық спорт түрлері мен мәдени іс-шаралар ұйымдастырылып, кешкі концертте Диана Исмаил, Ғазизхан Шекербек, Мөлдір Әуелбекова және Nurbullin өнер көрсетеді.
Ұйымдастырушылардың айтуынша, Райымбек ауданының 90 жылдығына арналған мерейтойлық бағдарлама өңірдің тарихи-мәдени келбетін танытып қана қоймай, Алматы облысының туристік тартымдылығын арттыруға да ықпал етеді.
Айта кетейік, Райымбек ауданы – қазақтың көрнекті ақыны Мұқағали Мақатаев дүниеге келген қасиетті өңір. Сондықтан мерейтойлық шаралар ауданның ғана емес, жалпы қазақ руханиятының мерекесіне айналмақ.
Шараға Алматы облысының тұрғындары мен қонақтары шақырылады.
