Мемлекеттік награданы Марат Сұлтанғазиев табыстап, Мемлекет басшысы Қасым-Жомарт Тоқаевтың құттықтау хатын оқып берді.
Стахан Белғожаев еңбек жолын 1962 жылы Шардара су электр стансасы құрылысында бастаған. Кейінгі жылдары еліміздегі бірқатар стратегиялық нысандардың жүзеге асуына тікелей атсалысқан.
Оның қатысуымен және басшылығымен Қапшағай су электр стансасы, Мойнақ су электр стансасы, Ақтоғай су электр стансасы, Бестөбе және Бартогай су қоймалары, сондай-ақ Үлкен Алматы каналы секілді ірі жобалар іске асырылған.
Бұл нысандар энергетика жүйесін дамытуға, су ресурстарын тиімді басқаруға, суармалы егіншілікті жетілдіруге және өңірлердің экономикалық әлеуетін арттыруға үлкен серпін берген.
Сонымен қатар еңбек ардагері ауыл шаруашылығы мен құрылыс салаларында да жемісті еңбек еткен. Оның басшылығымен өндірістік кешендер, заманауи жылыжайлар және қайта өңдеу кәсіпорындары салынған.
Президент Қасым-Жомарт Тоқаев құттықтау хатында Стахан Белғожаевтың ел дамуына қосқан үлесін ерекше атап өткен.
«Сіз ұзақ жыл бойы түрлі жауапты қызметті абыроймен атқарып, Жетісу өңірін көркейтуге мол үлес қостыңыз. “Мойнақ” су электр стансасын іске қосуға атсалысып, еліміздің энергетикалық қауіпсіздігін нығайтуға зор еңбек сіңірдіңіз. Ғибратты өмір жолыңыз өскелең ұрпаққа үлгі болады», – делінген хатта.
Алматы облысының әкімі Марат Сұлтанғазиев энергетика мен құрылыс саласының дамуына үлес қосқан аға буын өкілдерінің еңбегі әрдайым жоғары бағаланатынын айтты.
«Стахан Белғожаевтың еңбек жолы – кәсібіне адалдықтың, жоғары жауапкершіліктің және елге қызмет етудің жарқын үлгісі. Бұл марапат – бір адамның ғана емес, тұтас буынның еңбегіне көрсетілген құрмет», – деді облыс әкімі.
Шара барысында Стахан Белғожаевтың замандастары мен шәкірттері естеліктерімен бөлісіп, ізгі тілектерін жеткізді. Ал марапат иесі көрсетілген құрмет үшін алғыс айтып, ақ батасын берді.
