Министрлік мәліметінше, негізгі ҰБТ 10 мамырда басталып, 10 шілдеге дейін жалғасады. Талапкерлерге тестілеуді екі рет тапсыру мүмкіндігі беріледі. Бұл оларға грант конкурсына ең жоғары жинаған нәтижесімен қатысуға жол ашады.
Биыл тестілеуге 240 мыңға жуық талапкер өтініш берген. Екі мүмкіндік ескерілгенде жалпы 446 мыңнан астам өтініш қабылданған. Бұл өткен жылмен салыстырғанда жоғары көрсеткіш. 2025 жылы шамамен 216 мың талапкерден 399 мың өтініш түскен болатын.
Талапкерлердің 73 пайызы қазақ тілінде, 27 пайызға жуығы орыс тілінде тест тапсыруды таңдаған. Ал 521 адам ағылшын тілінде тестілеуге қатысуға өтініш білдірген.
Ең көп таңдалған бейіндік пәндер комбинациясы — “Математика-Физика”. Оны талапкерлердің 17,9 пайызы таңдаған. Екінші орында “Биология-Химия” (14,5 пайыз), ал үшінші орында “Шығармашылық емтихан” комбинациясы (12,4 пайыз).
ҰБТ-ға тіркелу Ұлттық тестілеу орталығының app.testcenter.kz сайты мен UTO.kz қосымшасы арқылы жүргізілді. Талапкерлер өздеріне ыңғайлы күнді, уақытты және тест тапсыру пунктін өздері таңдаған.
Министрлік талапкерлердің дайындық сапасын арттыру үшін бірқатар қосымша мүмкіндіктер қарастырылғанын атап өтті. Қаңтар және наурыз айларындағы ҰБТ тапсырған түлектерге әр пән бойынша жеке тақырыптық талдау ұсынылған. Бұл олардың әлсіз тұстарын анықтап, негізгі тестілеуге дейін дайындықты күшейтуіне мүмкіндік береді.
Сонымен қатар Ұлттық тестілеу орталығының сайтында байқау сынақтары іске қосылған. Талапкерлер үшін тест тапсырмалары құрастырылатын әдебиеттер тізімі, тест жоспары, “Қазақстан тарихы” мен “Дүниежүзі тарихы” пәндері бойынша 100 тарихи дата, “Информатика” пәнінен терминдер тізімі, сондай-ақ әдеби шығармалар тізімі жарияланған.
Министрлік 2026 жылы ҰБТ форматы өзгеріссіз қалатынын хабарлады. Талапкерлер үш міндетті және екі бейіндік пән бойынша тест тапсырады. Жалпы тапсырма саны — 120.
Оның ішінде “Қазақстан тарихынан” 20 сұрақ, “Оқу сауаттылығы” мен “Математикалық сауаттылықтан” 10 сұрақтан, ал екі бейіндік пәннің әрқайсысынан 40 сұрақтан беріледі. ҰБТ бойынша ең жоғары көрсеткіш — 140 балл.
