Өңір басшысы өз құттықтауында бұл мерекенің қазақстандықтар арасындағы татулық пен өзара құрметтің символы екенін атап өтті.
«Бұл – елімізде бейбітшілік пен келісімде өмір сүріп жатқан барлық азаматтардың бір-біріне деген құрметі мен ыстық ықыласы ерекше сезілетін күн. Бүгінде Қазақстанда 130-дан астам этнос өкілі өмір сүреді. Соның 105-і Алматы облысында тұрақтап, бірлік пен келісімде ғұмыр кешуде», – деді әкім.
Аймақ басшысының айтуынша, өңірде 34 этномәдени бірлестік белсенді жұмыс істейді. Олар дәстүрді сақтау, мәдениет пен руханиятты дамыту, сондай-ақ әлеуметтік-экономикалық өсімге үлес қосып келеді.
«Осындай ұйымдардың еңбегі арқылы қоғамдық келісім нақты мазмұнға ие болып, терең мәнге толығады. Қоғамдық бірлестіктерге, ақсақалдар мен аналар кеңестеріне ел бірлігін нығайту жолындағы қызметі үшін алғыс білдіремін», – деді Марат Сұлтанғазиев.
Сондай-ақ әкім Қазақстан халқының бірлігі, өзара ынтымақтастық пен бейбітшілік елдің басты құндылықтары екенін атап өтті.
Өңір басшысы тұрғындарға денсаулық, отбасыларына амандық, үйлеріне береке тілеп, елде әрдайым бейбітшілік пен татулық салтанат құруын тіледі.
