Кәсіпорынға ұйымдастырылған жұмыс сапарына Алматы облыстық ауыл шаруашылығы басқармасының, аудан әкімдігінің, Агроөнеркәсіптік саланы дамыту өңірлік орталығының, Аграрлық несие корпорациясының және «Қонаев» әлеуметтік-кәсіпкерлік корпорациясының өкілдері қатысты.
Сапар барысында қатысушылар бордақылау алаңының өндірістік нысандарын аралап, қолданыстағы инфрақұрылымның жай-күйімен танысты. Сонымен қатар кәсіпорынның өндірістік әлеуеті мен алдағы даму бағыттары талқыланды.
Кездесу барысында ет бағытындағы мал шаруашылығын дамыту, өндірістік қуатты ұлғайту, инвестициялық жобаларды іске асыру және агроөнеркәсіптік кешендегі ынтымақтастықты күшейту мәселелеріне ерекше назар аударылды.
Мамандар мұндай кәсіпорындардың өңірдегі мал шаруашылығы саласын дамытуда маңызды рөл атқаратынын атап өтті. Сондай-ақ өндірісті кеңейту арқылы ауыл шаруашылығы өнімдерінің көлемін арттыру және жаңа жұмыс орындарын құру мүмкіндіктері сөз болды.
Жұмыс сапарының қорытындысы бойынша кәсіпорын қызметінің тиімділігін арттыруға, инвестициялық белсенділікті ынталандыруға және ауданның агроөнеркәсіптік кешенін дамытуға бағытталған мемлекеттік қолдау тетіктері қарастырылды.
Айта кетейік, Алматы облысында агроөнеркәсіптік кешенді дамыту өңір экономикасының басым бағыттарының бірі саналады. Осы мақсатта ауыл шаруашылығы кәсіпорындарын қолдау және инвестиция тарту жұмыстары жүйелі түрде жүргізіліп келеді.
