Өңірде қолға алынған жобалардың бірі – қой жүнін терең өңдейтін комбинат. Жобаны MERGEN HOLDING ЖШС жүзеге асыруда. Кәсіпорынның жалпы аумағы 2 мың шаршы метрді құрайды, ал инвестициялық құны 1,2 млрд теңгеге бағаланған. Комбинат жылына 2 мың тоннадан астам қой жүнін өңдеуге қауқарлы болады.
Қазіргі таңда құрылыс алаңын қоршау және тегістеу жұмыстары жүргізіліп жатыр. Сонымен қатар, өндірістік жабдықтарды орнату үшін мердігерлермен келіссөздер жүргізілуде. Болашақта өңделген жүннен көрпе, текемет және өзге де тұрмыстық бұйымдар өндіріліп, ішкі нарыққа шығарылмақ. Өнімнің бір бөлігі экспортқа бағытталады.
Кеген ауданында жүзеге асырылып жатқан тағы бір жоба – сүт өңдеу зауыты. Бұл нысанды Kegen milk ЖШС салып жатыр. Зауыт тәулігіне 30 тоннаға дейін сиыр сүтін өңдеп, май, қаймақ, құрт, ірімшік секілді өнімдер шығарады.
Сонымен қатар, алдағы уақытта ірі қара терісін өңдейтін комбинаттың құрылысы да басталады деп жоспарланып отыр. Аталған кәсіпорында былғарыдан аяқ киім, сырт киімдер және басқа да өнімдер өндірілмек.
Жаңа өндіріс орындарының іске қосылуы өңірдің экономикалық әлеуетін арттырып қана қоймай, жергілікті тұрғындар үшін жаңа жұмыс орындарын ашуға мүмкіндік береді.
