«Таза ауыл» атауымен ұйымдастырылатын экологиялық шара ауданның барлық 12 ауылдық округін қамтиды. Ағаш отырғызу жұмыстары таңғы сағат 09:00-де басталады.
Іс-шараға Кеген ауданының әкімі Нұрбақыт Теңізбаев, аудандық мәслихат депутаттары, Құрметті азаматтар, қоғамдық кеңес мүшелері, жастар және түрлі мекеме өкілдері қатысады деп жоспарланған.
Акция аясында барлығы 3425 түп ағаш отырғызу көзделген. Оның ішінде абрикос, терек, шырша, қайың, туя, тал және итмұрын көшеттері бар.
Ұйымдастырушылардың мәліметінше, бұл бастама аудан аумағын көгалдандыру мен абаттандыру бағытындағы жүйелі жұмыстардың бір бөлігі саналады. Алдағы уақытта да мұндай шаралар кезең-кезеңімен жалғасады.
Айта кетейік, «Таза Қазақстан» бағдарламасы ел аумағында экологиялық мәдениетті қалыптастыруға, табиғатты қорғауға және елді мекендердің тазалығын арттыруға бағытталған.
Экологтар мұндай акциялар тұрғындардың табиғатқа деген жауапкершілігін арттырып, өңірлердің экологиялық ахуалын жақсартуға сеп болатынын айтады.
