Аудан көшелерінде сенбілік күні тек жұмыс емес, ерекше атмосфера байқалады: ата-аналар балаларымен бірге ағаш отырғызып, аула тазалап, экологиялық тәрбие берудің нақты үлгісін көрсетуде. Бұл — тазалықтың тек міндет емес, ұрпақтан ұрпаққа берілетін құндылық екенін айқындайтын жаңа үрдіс.
Аудан әкімінің айтуынша, мұндай формат тұрғындардың жауапкершілігін арттырып қана қоймай, қоғамда тазалық мәдениетін қалыптастыруға үлкен серпін береді. Себебі бала ата-анасының іс-әрекетін қайталайды.
Ал отбасы болып қатысқан сенбілік — экологиялық сананы қалыптастырудың ең тиімді жолдарының бірі.
Айта кетейік, бүгін Іле ауданында кезекті санитарлық тазалық сенбілігі өтті. Ауқымды шараға 2093 адам қатысып, 26 арнайы техника жұмылдырылды. Нәтижесінде аудан аумағынан 77,1 тонна қоқыс шығарылып, 1290 түп ағаш отырғызылды. Елді мекендердің көшелері мен қоғамдық орындары тазартылып, абаттандыру жұмыстары жүргізілді.
«Таза Қазақстан» экологиялық бастамасы бүгінде бір реттік акция шеңберінен әлдеқашан шығып, күнделікті өмір салтына айналып келеді. Бұл — тазалыққа деген көзқарасты өзгертіп, әр тұрғынның жеке жауапкершілігін күшейтетін ұлттық деңгейдегі идеология.
Іле ауданында қалыптасып келе жатқан жаңа формат — соның айқын дәлелі. Мұнда тазалық сенбілікпен шектелмейді, ол — отбасыдан басталатын мәдениет.
