Сонымен қатар елді мекендердің көркін арттыру мақсатында 10 мың қылқанжапырақты ағаш отырғызу жоспарланған.
Іле ауданы әкімінің орынбасары Алмас Бөкенаевтың айтуынша, бұл жұмыстар өткен жылы «Қазақстан темір жолы» АҚ-ға берілген рұқсат негізінде кесілген ағаштардың өтемі ретінде жүргізіліп жатыр.
«2025 жылдың мамыр айында аудандық тұрғын үй-коммуналдық шаруашылық және тұрғын үй инспекциясы “Алматы” стансасы торабын айналып өтетін теміржол желісін салу жобасы аясында шамамен 8500 ағашты кесуге рұқсат берген болатын. Қазіргі отырғызылып жатқан көшеттер сол кесілген ағаштардың орны толтыру мақсатында жүзеге асырылуда», – деді ол.
Жобаны «Ақбастау Gardens» ЖШС жүзеге асырып жатыр. Келісімге сәйкес отырғызылатын ағаштардың биіктігі 2,5 метрден, ал қылқанжапырақты түрлері 2 метрден кем болмауы тиіс.
Мердігер ұйымның учаске басшысы Сәбит Қарақұловтың сөзінше, бүгінде 6 мыңға жуық ағаш көшеті отырғызылған.
«Ағаш түрлері өңірдің климаттық ерекшелігіне сай таңдалды. Ыстыққа төзімді көшеттер отырғызылып жатыр. Сонымен қатар ылғалды сақтайтын арнайы гидрогель қоспасын қолданудамыз. Қазір 30 жұмысшы мен бірнеше техника жұмылдырылған. Күніне шамамен 2 мыңға жуық ағаш отырғызылуда. Жұмысты 1,5 ай ішінде толық аяқтауды жоспарлап отырмыз. Одан кейін 3 жыл бойы күтім жұмыстарын жүргізіп, нысанды жергілікті әкімдікке тапсырамыз», – деді ол.
Жоба толық жүзеге асқаннан кейін Іле ауданы жасыл желекке оранып, тұрғындарға жайлы экологиялық орта қалыптастыруға мүмкіндік береді.
Осылайша жұмыс толық аяқталған соң аудан жасыл желекке оранып, тұрғындар игілігіне айналмақ.
