Olympic мәліметінше, Головкин Даңқ залына алғашқы ұсынылған сәтінен-ақ қабылданған. Бұл кәсіби бокс әлеміндегі ең жоғары марапаттардың бірі саналады. Енді оның есімі Muhammad Ali, Mike Tyson, Floyd Mayweather Jr. және Manny Pacquiao секілді бокс тарихындағы аңыз тұлғалармен қатар аталады.
Қазақстандық спортшымен бірге «Класс-2026» құрамына америкалық Антонио Тарвер, британдық Найджел Бенн, жапониялық Наоко Фудзиока және мексикалық Джеки Нава енгізілді.
Геннадий Головкин бұл мәртебеге өзінің бірегей спорттық жетістіктерінің арқасында ие болды. Әуесқой бокста ол 350 жекпе-жектің 345-інде жеңіске жетіп, ұзақ жылдар бойы Қазақстан құрамасының көшбасшысы болды. Сонымен қатар әлемдік деңгейдегі ірі жарыстарда ел намысын абыроймен қорғады.
Кәсіпқой рингте Головкин XXI ғасырдағы орта салмақтағы ең үстем чемпиондардың біріне айналды. Ол кәсіби мансабында 45 жекпе-жек өткізіп, 42 рет жеңіске жетті. Оның 37-сі нокаутпен аяқталған.
Қазақстандық боксшы әр жылдары WBA, WBC, IBF және IBO тұжырымдары бойынша әлем чемпионы атанып, The Ring журналының чемпиондық белбеуін иеленді. Сондай-ақ ұзақ уақыт бойы салмақ дәрежесіне қарамастан үздік боксшылардың әлемдік рейтингінде көш бастады.
HBO телеарнасымен жасалған келісімшарттан кейін Головкин әлемдік бокстың басты жұлдыздарының біріне айналды. Оның шабуылға құрылған жарқын стилі мен жойқын соққылары миллиондаған жанкүйердің ықыласына бөленді. Қазақстандық боксшының жекпе-жектері тұрақты түрде әлем бойынша миллиондаған көрерменді экран алдына жинады.
Головкин орта салмақ тарихындағы бірнеше рекордтың иесі. Оның тоғыз жылға созылған қатарынан 23 нокауттық жеңісі дивизион тарихындағы ең ұзақ сериялардың бірі саналады. Сонымен қатар ол әлем чемпионы титулдарын 21 рет сәтті қорғады. Ал мерзімінен бұрын аяқталған жеңістер көрсеткіші 90 пайыздан асып, әлем чемпиондары арасындағы ең жоғары нәтижелердің бірі ретінде Гиннестің рекордтар кітабына енген.
Бүгінде Геннадий Головкин Қазақстанның спорттық мүддесін тек рингте ғана емес, халықаралық спорттық басқару деңгейінде де қорғап келеді. Ол Қазақстан Ұлттық Олимпиадалық комитеті президенті және World Boxing ұйымының президенті қызметтерін атқарады. Осылайша ол халықаралық спорт федерациясын басқарған алғашқы қазақстандық атанды.
