Төтенше жағдайлар министрлігінің мәліметінше, оқиға Еңбекшіқазақ ауданында болған. 112 жедел қызметінің пультіне Көлді ауылының маңында балық аулап жүрген ер адамның адасып кеткені туралы хабарлама түскен.
Хабарлама түскен бойда оқиға орнына іздестіру-құтқару жұмыстарын жүргізу үшін ТЖМ қызметкерлері жедел жіберілді. Құтқарушылар болжамды бағыт бойынша іздеу жұмыстарын ұйымдастырып, жоғалған азаматты қысқа уақыт ішінде анықтады.
Ведомство ер адам аман-есен табылып, қауіпсіз жерге шығарылғанын мәлімдеді. Оның өмірі мен денсаулығына қауіп төніп тұрған жоқ, медициналық көмек қажет болмаған.
Мамандар табиғат аясында демалыс ұйымдастыру немесе балық аулауға шығу кезінде қауіпсіздік талаптарын сақтаудың маңыздылығын ескертеді.
«Табиғатқа шығар алдында жақындарыңызға баратын бағытыңызды, нақты орналасқан жеріңізді және қай уақытта оралатыныңызды алдын ала хабарлап қойған жөн. Бұл төтенше жағдай туындаған кезде іздестіру жұмыстарын жеңілдетуге көмектеседі», – деп атап өтті ТЖМ өкілдері.
Құтқарушылар азаматтарды табиғат аясында серуендеу, аңшылық немесе балық аулау кезінде сақтық шараларын сақтауға және байланыс құралдарын өздерімен бірге алып жүруге шақырды.
