Енді сот шешімімен әрекетке қабілетсіз деп танылған 18 жастан асқан азаматтардың қамқоршылары eGov.kz порталында онлайн өтініш бере алады, деп хабарлайды alataunews.kz.
Мемлекеттік қызмет көрсету саласында «кедергісіз орта» құру мүмкіндіктері шектеулі азаматтар үшін тең жағдай жасауға бағытталған. Бұрын қамқоршылар қағаз түрінде құжат жинап, арнайы өтініштерді рәсімдеу үшін кезекке тұратын болса, енді жаңартылған қызмет бұл процесті онлайн форматта жеңілдетіп, уақытты едәуір үнемдеуге мүмкіндік береді.
Қамқоршылар eGov.kz порталында келесі қызмет түрлері бойынша онлайн өтініш бере алады:
- Мүгедектерге протездік-ортопедиялық көмекпен қамтамасыз ету;
- Бірінші топтағы жүріп-тұруы қиын мүгедектерге жеке көмекші қызметін ұсыну;
- Мүгедектерді техникалық көмекші (компенсаторлық) құралдармен қамтамасыз ету;
- Мүгедектерге арнайы жүріп-тұру құралдарын беру;
- Мүгедектер мен мүгедек балаларды санаторий-курорттық емдеумен қамтамасыз ету;
- Есту қабілеті нашар мүгедектерге ымдау тілі маманының қызметін (жылына 60 сағат) алу;
- Үйде күтім жасау жағдайында арнайы әлеуметтік қызметтер ұсыну;
- Медициналық-әлеуметтік мекемелерде (ұйымдарда) арнаулы әлеуметтік қызметтер алу.
Онлайн қызметтерді қалай алуға болады?
- eGov.kz порталында авторизациядан өтіп, «Әлеуметтік қамсыздандыру» бөліміне кіру қажет.
- «Мүгедектігі бар адамдарды қолдау» бөлімінен қажетті қызметті таңдау керек.
- Электронды цифрлық қолтаңба (ЭЦҚ) арқылы өтінішке қол қою қажет.
- Өтініш берілгеннен кейін оның өңделу барысы туралы хабарлама жеке кабинеттегі «Қызметтерді алу тарихы» бөлімінде көрсетіледі.
