Ер адамның бұл әрекеті көшедегі бейнежазбаға түсіп қалған. Оқиға 18 шілде күні, түнгі 00:00-ге таман орын алған.
Сырттан әйел адамның дауысын естіген Ұлттық ұланның әскери қызметшісі Жарқынбек Айдарханбеков далаға жүгіріп шығады. Шыға бергенде, белгісіз ер адамның әйелді жарақаттап жатқанын көреді. Әскериді көрген күдікті сол маңдағы зиратқа қаша жөнеледі. Бірақ, Жарқынбек Айдарханбеков артынан қуып, тығылып отырған жерінен ер азаматты ұстап алады.
Күдікті Надира есімді бұрынғы әйелінің 11 жеріне пышақ сұққан. Ал, Надираның анасы Махира көмекке ұмтылғанда, оны 3 рет жарақаттаған. Алған жарақаттан Надираның ішкі ағзаларына зақым келіп, ішке қан кеткен. Қазір жан сақтау бөлімінде жатыр. Анасының жағдайы қалыпты орташа.
Алматы қаласы ПД-ның хабарлауынша, аталған факті ҚР ҚК-нің 106-бабы бойынша сотқа дейінгі тергеп-тексеру басталған.
«Күдікті 31 жастағы ер адам ұсталып, уақытша ұстау изоляторына қамалды. Наурызбай аудандық Полиция басқармасы істің мән-жайын анықтау үшін жан-жақты толық тергеуге бағытталған іс-шараларды жүргізіп жатыр», – деді ПД өкілдері.
Қазіргі таңда әлеуметтік желілерде банк реквизиттері таралып, дүйім жұрт Надира мен Махираның еміне ақша жинап жатыр. Айта кетейік, осыдан бірнеше жыл бұрын Надираның әкесі өмірден озған. Сондықтан қазір олардың қамқоршысы жоқ. Көмек көрсетем деушілер болса, Надираның Kaspi нөмірі: 8 (707) 998 09 12.
