Қарасай ауданындағы осындай орталық 2025 жылдың 16 сәуірінде Ұмтыл ауылдық мәдениет үйі базасында ашылған. Бастама егде жастағы азаматтардың өмір сапасын арттыруға бағытталған кешенді әлеуметтік саясаттың бір бөлігіне айналған.
Орталық ашылған кезде 65 адам тіркелсе, бүгінде келушілер саны 121-ге жеткен. Бұл жобаға деген сұраныстың артқанын көрсетеді.
Бір жылдық мерейтой аясында ұйымдастырылған іс-шаралар орталықтың қызметін жан-жақты танытты. Қатысушылар тек көрермен емес, белсенді қатысушы ретінде түрлі бастамалар ұсынып, ұйымдастыру жұмыстарына да атсалысқан.
Мерекелік шара “Қолдан туған құндылық” атты көрмемен басталып, онда қатысушылардың қолөнер бұйымдары ұсынылды. Кейін концерттік бағдарлама жалғасып, күй орындалып, ән шырқалып, би биленді. Сонымен қатар орталықтың бір жылдық жұмысын қорытындылаған бейнеролик көрсетілді.
Қазіргі таңда орталық 11 бағыт бойынша тұрақты қызмет көрсетеді. Мамандардың айтуынша, алғаш келген азаматтардың денсаулық жағдайы мен әлеуметтік белсенділігі төмен болған. Алайда жүйелі жұмыстың нәтижесінде оң өзгерістер байқалған.
«Бір жылдың ішінде қызмет алушылар арасында жаңа әлеуметтік байланыстар қалыптасып, олардың қоғамдық өмірге қатысу деңгейі артты. Ең маңызды жетістіктердің бірі – цифрлық сауаттылықтың өсуі. Қатысушылар смартфон, мессенджерлер мен бейнеқоңырауларды еркін меңгеріп, заманауи ақпараттық кеңістікке бейімделе бастады», – деді Қарасай аудандық «Белсенді ұзақ өмір орталығы» филиалының кеңесшісі Аңса Дүйсенбай.
Мамандардың сөзінше, бұл өзгерістер – тек статистика емес, нақты адамдардың өміріндегі оң нәтижелер.
Айта кетейік, Қарасай ауданындағы «Белсенді ұзақ өмір орталығы» бір жылдың ішінде тиімді әлеуметтік алаңға айналып, егде жастағы азаматтардың белсенді өмір сүруіне мүмкіндік беріп отыр.
