Жаңадан тағайындалған судьяларды Алматы облыстық соты төрағасының міндетін атқарушы Қалдарбек Досымбет таныстырды.
Президент Жарлығына сәйкес, Еркін Байбутаев пен Қарлығаш Есалинова Алматы облыстық сотының судьялары болып тағайындалды. Ал Исмаил Сраилов Алматы облысының мамандандырылған ауданаралық әкімшілік сотының судьясы қызметіне кірісті.
Еркін Байбутаев 1971 жылы дүниеге келген. Сот жүйесіндегі еңбек жолын 1997 жылы бастап, осы уақытқа дейін түрлі лауазымдарда қызмет атқарған. Соңғы қызмет орны – Алматы облыстық мамандандырылған ауданаралық экономикалық соты.
Қарлығаш Есалинова 1972 жылы туған. Ол сот жүйесінде 1992 жылдан бері еңбек етіп келеді. Бұған дейін Алматы облысы Талғар аудандық сотының судьясы болған.
Ал Исмаил Сраилов 1990 жылы дүниеге келген. Әл-Фараби атындағы Қазақ ұлттық университетінің түлегі, құқықтану магистрі. Сот жүйесіне келгенге дейін заң саласында, соның ішінде басшылық және кеңесшілік қызметтерде жұмыс істеп, кәсіби тәжірибе жинақтаған.
Кездесу барысында Қалдарбек Досымбет жаңадан тағайындалған судьяларды құттықтап, олардың жаңа қызметтерінде табысқа жетуіне, әділдік пен объективтілік қағидаттарын берік ұстанып, сот төрелігін сапалы жүзеге асыруына тілектестік білдірді.
